لحظة متعلقشي

مشكورين الوخيان لكل الي زارو المدونة و خلاو تعليقات و الي ما خلاوش زاده أما حبيت نعطي توضيح على أفكاري و توجهاتي انا انسان متسامح من مدينة التسامح عاصمة الجلاء بنزرت . انا مسلم للأسف منصليش و للأسف زاده نتكيف مارس خفيفة مبسمة بش مندلا ميكبشش فية و للأسف زاده أعاقر بنات العنب .....ولكن هذا الكل ما يمنعشي أني انسان نؤمن بربي و بالملائكة و بالرسل و القضاء و القدر و الآخرة الى حد هنا متفاهمين . نعرف من غير المسلمين الكثير و عندي أصحاب من مختلف الديانات حتى اليهود و هي فرنسية الجنسية و تجي لتونس بين الحين و الآخر و عمري ما سبيت واحد منهم لسبب بسيط برشة أنهم ناس يحترمو أنفسهم و يحترمو الآخر . نحكي معا واحد ملحد مرة هو ولد بلادي و قرا معاية و تناقشنا هكة على موضوع الأله موجود موش موجود الحاجة الي شدت انتباهي معندوش هالحقد و البغض للدين و لربي كيف ما عند برشة عباد و قلت عباد احتراما للذات البشرية الي عندهم مثلا الشهير عاشور الناجي و سميتو باسمو لأني قررت معادش بش نحترمو عادة سي عاشور يسب في الأسلام فقط سب من الرسل محمد فقط سب من الكتب السماوية القرآن فقط السيد هذا كي حكا عالأله هو مهوش يسب في الأله و لكن يسب في التوانسة و من خلالهم كل المسلمين و علاش يسب فيهم خاطرهم مسلمين ....هل الأسلام خطأ نسب لأجله ؟ هل هذي حرية المعتقد الي يطالبو بيها لرواحهم و يجردوني منها خاطرني مسلم ؟؟ و حتى و لو منيش مسلم العملية مرفوضة شكلا و مضمونا كيفاش ولا لعب غشاشر صغار حلال

علينا حرام عليكم ؟؟ هو كان موش المجتمع متسامح ياخي ينجمو يلقاو رواحهم في وسط أغلبية ساحقة ما هكاكة سيدي عربي ياكل الغلة ويسب الملة ...أما بالنسبة لأسلوبي الفكاهي أو التمقعير كما يحلو للبعض تسميته أنا نتبع هذا الأسلوب لسبب بسيط أنو نخير العباد يضحكو علية خير ملي يبكيو على رواحهم و أخيرا راني سياسة فسخ الكومنتير معنديش و منيش في حاجة ليها لأني نمن بالمثل القائل الشيء من مأتاه لا يستغرب كان واحد يحب يوجهلي كلمة ولا شطر نجاوبو عن طيب خاطر راني منيش كيف ما يحاولو يصوروني بعض قوى الشر هاو حتى بوش خارج من البيت الأبيض ولا نوصيه عليهم على ذكر جورج بوش هو زادة مسيحي متطرف و ميسب كان في المسلمين غرايب و عجايب في هالدنيا ....الحاصل مرحبا بيكم في كل وقت و ربي يحيينا لمثالو اي نعم ربي الي برشة يسبو فيه

من أجل غد أفضل...... ؟

في الدستور أول صفحة : تونس دولة عربية نظامها جمهوري دينها الأسلام لغتها العربية الخ ...الحاجة الباهية في الفقرة هذي فمة نقطة تنجم تعود بالنفع على وزارة المالية يقول القايل كيفاش ؟ الدستور يقول تونس دولة دينها الأسلام معناها أغلبية التوانسة مسلمين و غير المسلمين هوما المسيحيين و اليهود و الائيكيين . وهنا نتوجه للسيد وزير المالية علاش في الجلسة القادمة متاع مجلس النواب منطرحوش مشروع قانون الجزية ؟ الجزية هي أداء يدفعوه الغير مسلمين للدولة و هذا مشروع واعد لأنا لاحضنا في المدة الأخيرة كثرت الحركات الألحادية و بدا تاخذ في صدى في صفوف تلامذة الباكالوريا و الي تشكل شريحة لا باس بيها مالمجتمع و الي تنجم تأثر على شرائح ما أهم بمرور الزمن و هكة نجمو نغطيو المصاريف الهائلة الي تصرفها الدولة في تدعيم المحروقات و المواد الأساسية و نواصلو مسيرة التنمية و بناء الدولة الحديثة . أما تخاف من أصحاب الديانات الأخرى و الملحدين ليدورو في الحياصة و يعتنقو الأسلام هربا من الجزية خاطر هوما الأغلبية متاعهم يعاندو و برة الي مهوش يقتدي بزميل في الدراسة ولا في العمل راهو معجب بفيلسوف ولا بمفكر . لهنا نحب نلفت نظر السيد وزير المالية و بالتشاور مع السيد وزير الداخلية والجماعات المحلية كل مواطن تونسي نسجلو في بطاقة تعريف متاعو شنوة انتمائو العقائدي و هكاكة الغير مسلمين كيف يحبو يدخلو لللأسلام نربحو الوقت قبل ما يهربو والجزية 3 و لا 4 سنين قضية في المحكمة و شهرين ولا 3 في قائمة الأنتظار متاع فضيلة المفتي . و هكة نكونو ضربنا عصفورين بحجرة و فيما يتعلق بقضية قفصة علاش وزارة الفلاحة متعملش بالتعاون مع فلاحي الجهة مشروع زراعات كبرى يزرعو حتى غرت و يحشوه بالمنجل لتشغيل أكثر ما يمكن من الشباب العاطل عن العمل يخلصوهم 4 دينارات في النهار و يتكفل الجيش الوطني بالدخان و الكسكروتات كفتاجي و الشركة التونسية لتوزيع و استغلال المياه توفر الكوكا كولا في الحنفيات هكة نكونو حلينا أكثر من شطر مشاكل الميزانية الى الأبد

عاشور الناجي .....مرة أخرى

و اذا أصابتكم مصيبة قولو انا لله و انا اليه راجعون

هذا سي عاشور الناجي ملحد و ماخذها وفقة احنا صحيح ضد التطرف و السلفية و المذاهب الأرهابية على اختلاف أنواعها و لكنا نرفضو رفضا باتا التطرف اللائيكي تحب تعبر على كفرك و فجورك عبر و خوذ راحتك اما في حدود المعقول خاطر و صلت لحد ما يسمحش باش واحد يسكت عليك وانت يا سي عاشور سبيت الجلالة انا توة نجم نكلملك عمار 404 يعملك عقلة عالمدونة متاعك و يحشيك في الحبس اما بما انك و اعوانك في ظلمات تعمهون الا من رحم ربي .برة خليك امضي قدما فيما انت فيه عالأقل متبردش علينا جهنم في الشتاء ندافاو بيك و بعماد حبيب و زميلكم ابليس و دحدوحة و ما الى ذلك من بؤر الكفر و الضلالة .اما بعبوص الكلب عمرو ما يتصاوب انا كيف سمعت حكاية الجنادبة الي خذاو في خاطرهم من ربي ياخي ضربو السماء بالحجر نعذرك انتي و أمثالك الي تنقادو وراء كتاب الفلسفة متاع الباكالوريا وانتم ما فاهمين منو شي و المثل يقول الجهل مصيبة صحيح مصيبة عظيمة . نيتشة خاطيه مسكين يحكي عالأخلاق و المدينة الفاضلة و موت الأله هو صورة مجازية لموت الأخلاق و القيم ظاهر فيكم مقريتوش بلاغة في الخامسة ثانوي مضاع شي اقراوها في تعليم الكبار و تو يحفظولكم زادة سورة الكافرون بش تعرفو شنية قيمتكم عند ربي الي انتم تسبو فيه . اخزرو لزعيمكم ابليس كيفاش صار فيه اهاوكة ذليل نهار و طولو و هو يلوج عالأشباه العباد بش يوسوسلهم انتي عاشور اتعس من ابليس عالأقل هو اعلى منك في الرتبة و هو الي يسير فيك وانتي ما رميت اذ رميت اما هذيكة سنة الحياة

ربنا لا تؤاخذنا ان نسينا أو أخظئنا
و لا تحمل علينا اصرا كما حملته على الذين من قبلنا
و لا تحملنا ما لا طاقة لنا به
واعف عنا و اغفر لنا وارحمنا
أنت مولانا فانصرنا على القوم الكافرين
آمين يارب العالمين

باب فرنسا و الجنسية الفرنسية و ولاد البلاد

تربع لكموتة ملك بير الحمراء على عرشه و سأل الحكيم حشيشة قائلا : ما أبغض الأشياء عندك يا حكيم ؟ سكت حشيشة برهة ثم أجاب أبغضها و أشدها مقتا هي فرنسا نعجب لكموتة من هذا الجواب فقال كيف تزعم أنك تمقت فرنسا و قد حرقت اليها عديد المرات فتنهد حشيشة مجيبا لا يا لكموتة اني مقتي لفرنسا وليد مصيبة ألمت بي ... انتفض لكموتة على عرشه و صاح شبيك ما قلتش بالحرام لما نلملهم جيش أوله عندي و آخره بين عينين ساركو و أدك باريس دكا لا تبنى من بعده أبدا فأجاب حشيشة ألم يأتك خبر أخي جون ميشال فقال لكموتة و كيف كان خبره قال لقد كان أخي هذا طيب الأخلاق هادئ الطباع و كان يحب فتاة و تبادله الأخرى نفس الشعور و ما كان يعكر صفو علاقتهما الا قريب للفتاة نجح في الحرقة الى فرنسا و كون ثروة من السرقة و بيع المخدرات و تجارة القحاب و كان هذا الأخير يمني نفسه بالزواج من الفتاة و اسمها سوزان . لما علم جون ميشال بأمر غريمه استشاط غضبا و قرر أن يعمل و يدخر الأموال حتى يفوز برضى والدة سوزان التي ترى أنه من العقل و حسن التدبير أن تهاجر ابنتها الى فرنسا حتى تضمن مستقبلها . و لما اقتنى جون ميشال سيارة و منزلا بعد أن عرالنا رؤوسنا و بيعنا في كل ما نملكو و طلب يد سوزان للزواج كان الرد بالرفض البات و الغير قابل للمراجعة تحت أي ظرف من الظروف رغم محاولات سوزان و الجيران . انا كي وصلني الخبر ما صدقتش اما بش نشوف الدنيا كيفاش ولات عمدك برشة فلوس حتى ولو سارقهم يفرحو بيك و يعطيوك بنتهم كان معندكش و انتي على مستوى عالي وولد عائلة يقولولك سامحنا معندناش بنات للعرس ..... حصيلو ما نطولش عليك الحكاية جون ميشال هبل و سوزان شنقت روحها و السيد الي حب يعرس بيها مات مقتول بعيار ناري في راسو بعد ما قلب المافيا في مليار و شوية . هذا الكل خاطر جون ميشال متوسط الحال و مهوش ياكل في الكافيار و يلبس في الرولكس و يسوق في مرسيدس شفت الدنيا كيفاش ؟؟ و يقولك متخلفين أشكون في العالم يصرف كيفنا على عرس كان المصروف الي بعد كتبان الصداق الكل يتجمل يكفي الراجل و مرتو 5 ولا 6 سنين .....بلادنا باهية و خير من 100000 بلاد اخرى اما احنا مخاخنا مصددة و لتو ضحية الجشع متاعنا فرنسا كان جات تنفع راهي نفعت ولادها واحنا كان جينا نصلحو رانا صلحنا لبلادنا و الي يعمل يلقى . سالت دمعة حارة على خد لكموتة ثم قال كان جات الدنيا دنيا ميعطي حد بنتو لغبار ولا سارق ولا ماكرو أما الفلوس عمات العباد هذي هي اخرتنا عبيد لوسخ دار الدنيا و ياله من وسخ

من هو عاشور الناجي ؟

عاشور الناجي هو كرارطي من الذاكرة الشعبية المصرية أما عاشور الناجي هذا فهو جعداري و متسؤلونيش شنوة معناها خاطر منعرفش الحاصل سبب عركتو مع الأله قالك سي الناجي كان مصلي و تقي و ورع مالدار للجامع و مالجامع للدار حتى الخدمة بطلها الصلاة و ما قالت الناس لين ولا ساعات يحس بروحو ولا من الصالحين . نهار قالك قام صلى الصبح حاضر في الجامع و روح اتكى عالفرش و غمض عينيه و را منام : جاه جبريل قالو راهو بقرار سامي بش تولي انتي نبي و بش تبث الدعوة .... سي الناجي موش مصدق قالو موش سيدنا محمد آخر الأنبياء ؟ قالو جبريل ماو نقحنا الدستور و بش تولي انتي خاتم المرسلين قالو الناجي اي كيفاش نعمل ؟ غزرلو جبريل قالو برة للبيبلينات اعمل بلوغ و بث الدعوة عالأنترنت . أي سي الناجي قام فرحان صلى ركعتين لنية التوفيق و

لبس حوايجو و تم خارج هو هكاكة و تفكر الي معندوش فلوس بش يكونكتي

اي رجع للدار و قعد يخمم لين هزو النوم .... عاود جاه جبريل في المنام قالو تي قوم برة انشر الدعوة شبيك راقد قالو معنديش فلوس ابعثولي ماندة نلقى باش نمول الحملة غزرلو جبريل قالو راهي هالأيامات طايحة بينا اتصرف انتي تو نرجعولك و قام الناجي مشا لجارو تسلف خمسة دينارات حتى لراس الشهر و مشا عمل بلوغ و تم مروح . أي السيد اقتنع الي هو نبي و عمل جو في مخو و قال انا توة انجم نعمل معجزات كيف زملائي تره نجرب مشا طلع فوق السطح و نقز ياخي طاح يدو تكسرت رساطلو بايت في القصاب. في الليل عاود جاه جبريل في المنام يطل عليه جابلو 4 كعبات ياغرط دليس دانون في ساشي بيضة ممنوعين الساشيات لكحل لفوق زادة , قالو لباس عليك يا ولدي؟ سي الناجي تنرفز قالو تقولي نبي جيت بش نطير شوية شعرة لكسرت راسي ...قالو جبريل عاد قبل ما تستعمل أوبسيون ماو أكتيفيها قبل كلم الرقم الأخضر و تبع الموزع الصوتي .....اي سي الناجي خرج مالقصاب يدو في جبيرة منرفز و مقهور مشا روح شد التليفون طلب الرقم الأخضر هو بدا يتكلم و الكارطة بو عشرة الي صبها وفات لقد استنفدتم رصيدكم الرجاء.....قال معادش فيها يلزم نشوف حل مشا عطاها صحفة لبلابي و كاس رايب و روح خمر بالنوم . جاهش سي جبريل كالعادة قالو اي وين وصلت في الدعوة سي الناجي قالو برجولية راني و صلت توة متسلف 500 دينار و معادش انجم نزيد و راني مصحح على كمبالات و خايف لترصيلي في قلبو قالو لا متخافش أتو نشوفلك أمين المال يتصرفلك في منحة مستعجلة بعد 3 أيام قام سي الناجي الصباح يلقى جواب مسكر تحت المخدة فرح قال الماندة وصلت . حل الجواب يلقى فيه ورقة مكتوب عليها منحة تنقل و 2500 فرنك مفهم شي حصيلو قعد شادد راصو و الوجايع تهز و تجيب لين غلبو النوم رقد . هو غمض عينيه من هنا و جبريل جاه عجاجة قالو برص أمك صاحبي عندكشي حق أبيل ... سي الناجي معادش فيه مشا سب جبريل لا خلالو لا بقالو و قام منرفز طلع للسطح و يضرب في السماء بالحجر و يصيح أنا نبي تتمنيكو علي عامليني تكركيرة ...و جات الأسعاف متاع الرازي هزتو بعد ما شكاو الجيران . عدى سي الناجي قريب العام في منوبة و كي خرج جاه استدعاء مالمحكمة ,الجماعة لي تسلف من عندهم فلوس شكاو بيه و تحكم بخمسة شهور حبس . الراجل عدى الخمسة شهور حلو و مر و خرج مستهوش جملة لا ربي لا محمد قالك معادش مستعرف بحد حتى من البابة متاع يدو ليمين قصو بش معادش يشهد . و زاد بدل البلوغ متاعو ولا يسب في ربي و في جبريل هذا هو باختصار شديد سي عاشور الناجي

الجزار يعظم عالمراقزي ؟؟؟

بعد 60 سنة مازالت فلسطين تتخبط في أيدي الأحتلال الأسرائيلي ّشي يوجع القلب و هذا الكل من مخلفات الدولة العثمانية و الأنتداب البريطاني و الحماية الفرنسية . القوى الأستعمارية خلفت وراها الجهل و التخلف و الرجعية . في فلسطين مثلا أسباب فشل المقاومة في انتزاع الأستقلال هي أنو الفلسطينيين حبو يخرجو اسرائيل في نهار و كان ذلك ممكن لولا تدخل القوى العظمى المهم الي في وضعية كيف هكة يلزم الواحد يتوخى سياسة المراحل كيف ما قال الزعيم الراحل الحبيب بورقيبة أما عاد النخوة العربية و هات ماكلاوي الجماعة في بالهم اليهود وحهم و ماعندهم حد ياخي فرنسا و أمريكا و الدنيا لكل جات معاهم و اليوم المشكل زاد تفاقم بما أنو الحركات السياسية في فلسطين تتقاتل بعد ما مات ياسر عرفات تفككت المقاومة و ظهرت النوايا المبيتة على أرض الواقع جماعة فتح و حماس : جماعة حققو البرنامج القذر متاعهم و جماعة تلم في القذارة و تستنى في الفرصة بش توصل للسلطة و تحقق مآربها و يسبو في بعضهم و يتبادلو في التهم و قعدو فضيحة في العالم الكل . الأعانات و الهبات تاخذ فيهم السلطة مليارات الدولارات ماشين في الكراهب و الفيلات متاع فتح و السلاح و الذخيرة متاع حماس و هوما ما همش فاهمين الي كان يصرفو الفلوس هذي على الشعب و يوحدو صفوفهم حتى أمريكا يغلبوها أنا نتمنا فلسطين تتحرر و تولي دولة عاصمتها القدس أما في قرارة نفسي نعرف الي هذا يكاد يكون معجزة لا يزي الفلسطينين مش متفاهمين لا
يزي الدول المجاورة تتهرب مالأحراج و خايفة لتاكل كف من عند أسيادها والي زاد أنو المجتمع الدولي مساند للقضية الأسرائيلية و موش مستعرف بفلسطين جملة تي الحاصل ميزيريا في هالعالم

يا باكيا على الحرية

الى السيد الي ينوح عالحرية
أنا منحبش نكون حاد برشة و نعمل الدوانة مع العباد أما برجولية و يقال أيضا برجوكبدة راك كثرت . توة تطالب بالحرية و انتي مخك يتخبط في الأستعمار العاطفي متاع الناس الي تعتبرهم قدوتك لين وليت الخيال متاعهم أكثر من هكة كتاباتك مربوطة بكتاباتهم كي نقرا أرتيكل متاع حد منهم نعرفك انتي علاش بش تحكي عيش خويا خوذ انتي حريتك الفكرية و سيب عليك منهم الجماعة راهم حكايتهم فارغة و تبع الصحاح كما قال الفنان الكبير الهادي حبوبة

اذا عطاك العاطي لا تشاطي و لا تباطي