باب اأنترنات و م س ن ولد عايشة

استدعى لكموتة ملك بير الحمراء حشيشة الحكيم و قال له : يا حكيمنا اضرب لي مثل الي كذب كذبة و صدقها فقال حشيشة قد علمت يل لكموتة أدام اله عزك أنه كان بحومة الزاوية فتى يقال له ولد عايشة و هذا و لد عايشة مغروم بالأنفورمتيك و الأدوات الرقمية عاد منحكيلكش السيد انترنات و دنيا و عامل جو يتلشرجي في النهار جيغا ولا اثنين أفلام سلاطة و يغرافيهم و يرقد و منخبيش عليك يا لكموتة العظيم مرة طلبتو في فيلم قالي جيب فلاش ديسك ياخي مشيت لحبيب سلفني فلاش بش منقعدش راجع للدار اي و كان اللي كان و تفرجت في الفيلم أما اش بش نحكيلك شي مفرط ياسر بصراحة كان جاو عنا منهم في بلادنا راهو شطر الشعب آبائهم في الحبس و الشطر اللأخر في الحبس ....عاد ولد عايشة نهار في قهوة المثقفين مبنك يحكي عالبيراتاج و الم س ن و كيفاش تبيراتي و واحد و كل شيء و العباد عاطية وذنيها تقول الدكتور بشير التركي الله يذكرو بالخير يلقي في محاضرة الحاصل الي يكتب في كراسة والي في جريدة و الي على يدو و تفرقو الجماعة كل واحد شد اورديناتور على أمل أنو ينجح في العملية و ما تفطن حد الى أنو قع ضحية لولد عايشة علاش مش هوما هكة و قوات عمار 404 تسكر المواقع لكل وقتها قام الشيخ الجليل قجر و جاب الحل و تحقق النصر المبين علىيديه و الى يومنا هذا مازال شبابنا يبحر و يعبر و يخترق في دفاعات عمار .نرجعو لموضوعنا عاد قالك نهار المسؤول مكونكتي في الم سن جاتو انفيتسيون قبلها و بدا يحكي الراجل و يا ليتو تي هو الي صار مبروك عاد قالك السيد لي حكا معاه متفاهموش مشا المسؤول بلوكاه علاش مش هو مبلوكيه و السيد مازال يحكي ؟؟؟ المسؤول دخل و خرج في الحلة و يخطف ليكرون و يقلو سمالله هبطو فلوس و مشا يجري لولد عايشة يلقاه في الكوجينة مسكر الباب يعمل فاك القضية . ترمى عليه المسؤول و حكالو لي صار لكل ولد عايشة قالو اخطاني راني ضلمة في الأمور هذي و الله خاطيني و سامحني لبرة عندي ما نعمل مشا المسؤول يضرب في الأرض بغير هدى و يرى في كرهبة الشرطة و هنا أحس بعزرائيل يبتسم ابتسلمته الشهيرة : هاو باش ان...أمك ارتعدت فرائصه ثم اعتدل و مشى للدار و من غدوى نسا لحكايه . هذا يا لكموتة العظيم حال الي يطمع العباد و يخليها بيهم و نعرف الي انت مفهمت شي كالعادة فانتفض لكموتة مربربا قائلا كلاما لا يصح قوله ههنا