تداعيات الحرب الصليبية الجديدة وتقهقر الدول ألأسلامية

أول سؤال يتبادر الى ذهني كي نفكر في الملحدين هو علاش عبد يكون مسلم ثم يكفر بربي فرد مرة ؟ الجواب الي وصلتلو فيه 2 محاور أساسية الي هوما الحرب الشعواء الي أعلنها الصليبيون بقيادة جورج بوش و تقهقر الدول الأسلامية . اذن نتناولو بالتحليل كل عنصر على حدة

*الحرب الصليبية ضد الأسلام

في السنين الأخيرة و خاصة بعد حادثة 11 سبتمبر 2001 و الظروف و الملابسات الغامضة متاع الحادثة الي الناس لكل نعرفوها ولات فمة حركات معادية للأسلام الشيء الي مهوش جديد و لكنو أصبح علني . الحروب المتتالية على دول اسلامية أفغانستان و العراق و التهديدات الي تتلقى فيها دول كيف سوريا و ايران و الملف النووي الأيراني و الهالة الأعلامية الكبيرة الي تصاحب كل مشكلة تتعلق بدولة مسلمة و أخيرا و ليس آخرا الكاريكاتير في المجلة الدنماركية هذي الكل في اطار حملة عنصرية صهيونية ضد الأسلام . و ميخفى حد الدور الكبير الي تلعبو اسرائيل في المعمعة هذي الكل يا سيدي المغضوب عليهم يحبو يشوهو صورة الأسلام و يضهرو هوما بمظهر الضحية و هو الشيء الي نجحو فيه للأسف الشديد . وصلنا اليوم الي فما ضعاف الأنفس الي ولاو يستعارو من دينهم و يحشمو من كونهم مسلمين لقاو المخرج من هالمأزق هو الألحاد هاو منمن بحتى دين و خليني رايض المشكلة الي هوما استعارو من دينهم فما بالك بلادهم و ناسهم لعاد فمة وازع ديني لا وطنية لا انتماء

*تقهقر الدول الأسلامية

سبب هذا التقهقر مهوش اقتصادي و مهوش سياسي بل هو ديني . ديني لسبب بسيط أنو شيوخ الظلام و أصحاب العمائم و فضائيات الغيبوبة قاعدة تقدم في صورة قاتمة للدين فتاوى مالحيط يحرمو في كل شيء ما خلاو شي حلال و تطاول على الشعوب و الدول و تبادل التهم فيما بينهم جماعة يكفرو في جماعة و زيد الشيعة والسنة و التيارات الأرهابية الفاسقة الشي الي يخلي الأنسان ميفهم شي شكون الي على حق و شكون على باطل . القرآن قدامك فيه الحرام و الحلال و الأعمال بالنيات و الله غفور رحيم اما اعطيني شكون يفهم . الله ليس في حاجة ليهدي له عباده قالها محمد الصغير ولاد احمد في حوار تلفزي و كلامو فيه شيء من الصواب انا واحد مالناس كي يجي القرضاوي يتطاول على التوانسة في قناة الفضائح الي قاطعتها عندي 3 سنين الجزيرة و كي كشك و قطب يهين الزعيم الراحل الحبيب بورقيبة ميجيش . الأسلام دين تسامح عمرو مكان الترهيب مبدأ فيه بل هو حل أخير الأساس هو الحوار و الأقناع والي يقصد يقصد دار كبيرة . هذا شصدرلنا الأزهر الشريف و هذا شسببولنا آل سعود و جماعة الكشاطي جملة ولا منين جانة هالهم هذا احنا متاع ارهاب و الحاد و ريق بارد ؟ تي قداش احنا 10 ملاين تي منجيوش حومة في الصين تقلي تيارات و معارضة و رويق بارد . والله عيب الشي الي تعملو فيكم قعدتو ماريونات تحرك فيكم قوى خارجية معادية ناقمة عالتقدم و التطور الي وصلتلو تونس صحيح البترول غالي اما هاو بوش يحب المشاكل آش نعملولو بربي نبطلو معادش نسوقو الكراهب ؟ أمريكا بيدها الي تتشدق بالشعارات الفضفاضة متاع الديمقراطية و حرية التعبير تقتل و تقمع و تعذب و تسجن في الآلاف كل يوم لا لذنب ارتكبوه و لكن لأنهم مهمش مع أمريكا ....أمريكا تفكرني بنمروذ الي حكم العالم و قتلتو حشرة حتى أمريكا بش تكون نهايتها على نفس الشاكلة اما مش توة مازلنا نستحقولها في طرف قروض و طرف تكنولوجيا و كيما يقولو ناس بكري بوس الكلب من فمو حتى تقضي قضيتك منو