المخدرات.....من يبيع و من يشتري ؟

المخدرات , هذا الشر المحدق بنا من كل صوب , يستنزف العقول و الأموال و يلقي بالآلاف كل سنة وراء القضبان عملة لا تنضب و سبيل للكسب السريع . مصادره متنوعة و متعددة يأتي من الخارج خاصة من الدول المجاورة و أوروبا . صحيح الي يسرق يغلب الي يحاحي و لكن ليس بهاته الكيفية , مئات الكيلوغرامات تروج يوميا في الشوارع و شباب تائه في ملكوت الله بفعل هذه المواد . مروجون يبغون الربح و الثروة و مستهلكون ينشدون المتعة و اللذة , نسيان واقع أليم و مستقبل مظلم . مستقبل قاتم بما أنه يؤدي إلى بوفردة لمدة طويلة , هذه السموم ليست حكرا على طبقة معينة بل تستهدف الجميع . كيف يعقل أن المروجين لا زالوا يروجون ؟ ألم يقبض بعد على جيل كامل من تجار المخدرات ؟ من يروج المخدرات إذن ؟
الرشوة.......نعم , مروجو المخدرات يرشون رجال الأمن من العون العادي إلى رئيس الإقليم ,يتغافلون عن نشاطاتهم الإجرامية و يعلمونهم بأوقات الدوريات بل و يطلقون سراحهم و بحوزتهم مواد ممنوعة . وين ماشين بهالرشوة ؟ كي ما تخافوش ربي خافو على ولادكم و على أولاد أولادكم , ما مات حد و هز فلوس معاه . اش خليتو للمجرم كان انتم الأمن الي مالمفروض يطبق القانون عالعباد مالا المنحرف اش يعمل ؟نهار آخر نوليو عصابات و كرطوش يخيط على غرار المثال الأمريكي و عصابات تتحارب و قتل و مقتول , من حرس المرور الى الشرطة البلدية مرورا بوحدات التدخل , بكلها ترتشي إلا من رحم ربي . كي تجي تسأل يقولك الشهرية متكفيش الجمعتين اللولانين و الباقي سلف و تمقيص , ياخي بربي واحد ياخو في 300 دينار و يحب دار ملك و كرهبة و معرس و عندو 3 صغار و متحكيش عالكليماتيزور و الأورديناتور و الأنترنات و اشتراك قنوات المشفرة .....ماهو على قد حصيرتك مد ساقيك ولا الغاية تبرر الوسيلة ؟
من سيلقي القبض على من اذا مكافحة المخدرات تجي تعمل مداهمة و قبل بساعة المشبوه يجيه تليفون و يحذروه كيفاش بش تقضي على آفة كيف هاذي ؟ الحل ننسجو عالمنوال الأوروبي و نجبدو البساط من تحت أرجل هالجماعة , تقنين تجارة المخدرات ببيع كميات محدودة و مضبوطة للمستهلكين على الأقل فلوس المخدرات تمشي للدولة خير من أنها تمشي لشراء الأسلحة و الرقيق و ما خفي كان أعظم و كيف ما قالوا ناس قبل الامء الي ماشي للسدرة الزيتونة أولى بيه